Su calai de su soli (arbescidòrgiu) in sa parti ocidentali de Sardìnnia, si mirat mellus ananti de unu bellu pratu de frègula o de una arrustida de pisci friscu, paris a is binus de innia etotu.
Su ristoranti San Nicolò est unu de cussus logus chi s’agatat diaderus in mari. Incarau in sa praja de Santu Nicolau in su Gurfu de su Lioni, a duus chilometrus de Bugerru, bidda de piscadoris e minadoris in sa provìncia de Carbònia-Igrèsias. Finsas su Ristoranti San Nicolò est acapiau a is fatus stòricus de custu logu.
“Babu miu fiat minadori”, si contat sa meri Rossella Cavassa, “in su interis a mama no ddi andàt a fai sceti is cosas de domu, po cussu si funt indepidaus aberendi sa prima piola in mari, chi agoa est bènnia a essi unu ristoranti.
Is fillus, deu paris a issus, ant sighiu sa sienda de famìllia e oi su ristoranti est una sienda beni connota chi at lòmpiu ocannu is 50 annus de atividadi. Oi seu deu sa meri de su ristoranti, chi seu mandendi ainnantis paris a fillas mias chi m’agiudant màssimu in s’istadi, candu nci passat genti meda. A prus de cumbidai cosa de papai de su logu e menù mannus, coxinaus su pisci de dònnia manera e meda bortas traballaus cun su piscau de sa dii.”
“Calincunu annu a oi”, sighit Rossella, “eus pigau parti a unu bandu regionali e nd’eus otentu su tìtulu de “ristorante tipico”, pighendi finsas unu finantziamentu po ai presentau unu progetu po avalorai sa Sardìnnia. Ia detzìdiu difatis de aberri unu spuntoneddu po bendi a is turistas produtus de artesanus pagu connotus e de àterus logus piticus chi perou balint meda. Est una buteghedda apretziada meda poita apustis de s’esperièntzia in ristoranti is personis si podint e si bolint ingolli calincuna cosa chi ant papau o chi no ant provau. Funt ideas po arregalus e produtus de su logu abisitau.
Su Risoranti fait parti de su Circuito Sardex.net pagu prus de unu annu. “Ia lìgiu calincunu artìculu chi mi iat incuriosiu, duncas apu circau mellus e mandau una missada, e agoa s’apu atobiau. Depu nai ca seu cuntenta meda de essi parti de su Circùitu. Apu connotu una surra de siendas e imoi candu depu comporai calincuna cosa càstiu prima sa disponibilidadi e s’oferta aìnturu de su circùitu. Làstima ca no acudu a ndi tenni ca ddus spàciu luegus! Is crèditus ddus imperu po pagai is furnidoris e po sa spesa cosa mia. Sa genti chi benint a s’agatai tenint sa possibilidadi de dromiri me in is apartamentus chi teneus in Bugerru, duncas cuncordaus finsas “pachetus” in Sardex.”
“Su circuitu”, dda serrat Rossella, “at agiudau de seguru su traballu nostu, poita donat licuididadi e m’at finsas permìtiu de connosci genti chi deghinou no ia connotu mai, seu pensendi a is piciocus de s’enoteca e alimentari Spirito di Vino de Nùgoro, po fai unu esèmpiu.
Ddu scieis ca sa cosa chi mi praxit de prus est a contai sa stòria de Sardex a is turistas? Genti meda m’ascurtant con prexu. Chi bandas a circai in s’arretza Sulcis-Iglesiente is primas cosas chi agatas in Google funt “crisi”, “Alcoa” e cosas diaici. Gràtzias a su circùitu potzu chistionai beni de su logu me innui bivu, poita scit donai possibilidadis medas de parti de arrialidadis piticas ma chi funt mannas puru.
Furriau in sardu de Tiziana Furcas e torrau a castiai de su Portalitu Lìngua Sarda de sa Provìncia de Casteddu