Botteega est sa sienda apenas nàscia chi collegat produsidoris, consumadoris e siendas. Si podint comporai is produtus de sa terra e cussus artigianalis inderetura de is butegas de is bixinaus e de is produsidoris, cun sa possibilidadi de arriciri sa spesa in domu etotu, sceti cun d-unu click.

Botteega est su mercau de s’arretza de Casteddu chi ti permitit de fai sa spesa cosa tua in lìnia, inderetura de is mercaus de su logu o de is produsidoris.

Botteega est nàscia in su 2013, e at incingiau is traballus in su 2014. Casteddu est sa citadi innui est partiu totu, ma tra unu pagheddu su servitziu dd’ant a tentai finsas in Roma.

Andeus a connosci calincuna cosa de prus impari a Alessandro Massarelli, s’òmini chi at tentu sa bidea paris a Clara Lobina.

“Apu traballau po Google in Milanu po seti annus, apustis seu mòviu a Casteddu e apu connotu meda genti in custus atòbius de cosa de papai, po sa terra e po fai cresci s’economia de su logu.

Funt cosas chi mi-nci pigant e chi funt diventadas su traballu cosa mia. Apu bitu ca no s’agatàt una manera còmoda po fai sa spesa in su pròpriu logu me innui si bivit, chi lassessit su dinai in sa terra e chi bendessit cosa frisca de dònnia dii”.

“Sa genti est meda cuntenta de is cosas chi bendeus”, sighit Alessando, “is cosas ndi arribant de su Mercau de San Benedetto, de su mercau de Campagna Amica sa giòbia, e de is produsidoris localis,

funt issus is chi bendint. Comenti guadàngiat Botteega? Una percentuali po sa cumissioni a segunda de sa cosa bèndia e de su furnidori.”

In su situ ddoi at prus de milli produtus e sendi una surra, custu permitit de fai una spesa manna e cumpreta. Nosu seus una “piattaforma” po fai is cosas prus fàcilis. No bolestis una butega de cosas sardas, est unu servìtziu po donai una manu de agiudu, una borta a sa cida, a sa terra sarda in sa vida de dònnia dii, faendi-tì biri ca s’agatat unu logu nodiu. Sa spesa ti-nci-dda portaus a domu tua a bicicreta o cun is curreris, e imoi eus cumentzau a spediri in continenti puru.

Sa truma chi traballat po Botteega est fata de unu svilupadori, de s’arrrespunsàbili po s’àrea operativo-logìstica e de àterus collaboradoris.

Cun custu sistema is produsidoris faint marketing online, bendendi is cosas insoru che arribant a domu de is crientis allestru e chentza de strobu. In prus agiudaus s’economia locali. “Eus decìdiu luegus de fai parti de Sardex.net, poita sa bidea de fundu s’assimbillat meda a sa nosta, si contat Alessandro. Seu meda prexau ca sa dii etotu chi seus intraus in su Circuitu Sardex.net eus fatu una pariga de cumissionis paghendi in sardex. In su situ impari a sa setzioni po pagai in èurus s’agatat finsas cussa po pagai in Sardex.

Sa spera imoi est de ndi pinnigai àterus mercaus e benni a èssiri un’arreferimentu po is produsidoris e is crientis, arresparmiendi tempus, incurtzendi is tretus e premiendi is territòrius.

Furriau in sardu de Tiziana Furcas e torrau a castiai de su Portalitu de sa Lìngua Sarda de sa Provìncia de Casteddu

INSERITO IN:

• Da tutti i Circuiti
• Sardex
• Scritus sardus

Tag:

• Botteega
• Casteddu
• economia locale